كل ما يخص شركات البارتنر الخاصة بقنوات يوتيوب وتوضيح كل نقاط الاختلاف بديل ادسنس

كل ما يخص شركات البارتنر الخاصة بقنوات يوتيوب وتوضيح كل نقاط الاختلاف بديل ادسنس

 اولاً نبذة سريعة عن فكرة العمل مع بارتنر خارجي لقنوات يوتيوب بخلاف ادسنس

كل ما يخص موضوع شركات البارتنر الخاصة بقنوات يوتيوب وتوضيح كل نقاط الاختلاف والمزاعم والاساطير اللي موجوده حول الموضوع ولمحاولة انهاء الجدل ودحر الفتي والرزع الكتير اللي يخص شركات البارتنر وها قد جائت اللحظة.
*الموضوع طويل ولازم يبقي طويل لازم تستحملوني وتقرأو للاخر*
هيدلاين بالبونط العريض .. (انتهي عصر ادسنس ويوتيوب).
ليه كل ده هنعرفه في المقال ده بس دي نقطة لازم ترسخها في دماغك.

اولاً نبذة سريعة عن فكرة العمل مع بارتنر خارجي لقنوات يوتيوب بخلاف ادسنس

لو انت منشئ محتوي علي يوتيوب فانت قدامك طريقتين عشان تشتغل علي الموقع اول طريقة المعروفة للجميع انك تربط قناتك مع حساب ادسنس والطريقة التانية انك تستعين بشبكة MCN او لوحة CMS مقدمة من اي شركة خارجية غير ادسنس لادارة قناتك وادارة اعدادات تحقيق الدخل عليها.
نوضح الاول مميزات وعيوب كل طريقة من دول وبعدين نعمل مقارنة بينهم عشان نسهل علي بعض تحديد الافضلية.
(مميزات وعيوب الربط المباشر مع جوجل ادسنس)
*المميزات: اول ميزة والمعروفة للجميع انك مش هتبقي متضر تشارك نسبة من ارباحك مع احد وجميع الارباح اللي هتجنيها هتوصلك كاملة بخلاف النسبة الثابتة مع يوتيوب ممثل في شركة جوجل وهي النسبة المبهمة لمشاركة ارباح اعلانات يوتيوب وبقول مبهمة لانها لحد وقت قليل كانت معلنه للجميع في حسابات ادسنس المستضافة علي يوتيوب وكانت 68% لمنشئ المحتوي والباقي لجوجل ولكن بعد ازالتها من جميع حسابات الادسنس وبعد مراجعة الفروقات بين الارباح المقدرة واسعار الاعلانات في لوحة احصائات يوتيوب بنتأكد ان جوجل ويوتيوب طمعوا في نسبة اكبر من النسبة القديمة وبتقدير بسيط تقدر تقول النسبة تخطت الـ 50% لجوجل ويوتيوب حالياً ولكن وده في الاخر مش موضوعنا بس استغليت مقال النهارده في اني اوضح المعلومة دي لان كتير من الناس مش واخده بالها منها خالص وكله كان بيتسأل ليه تم حذف نسبة الناشر من جميع الحسابات في الفترة الاخيرة.
طيب ايه الميزة التانية اللي وانت بتكون رابط بأدسنس؟ (مفيش) !!! كل اللي جاي بعد كده عيوب.
ونبدأ مع بعض في استعراض عيوب العمل المباشر بقناتك مع جوجل ادسنس ومعظمها عيوب مستجدة.
*العيوب*
اولاً لو انت مع ادسنس انت مطالب بالوقوف في طابور المراجعات للقنوات حتي تتمكن من تفعيل تحقيق الدخل بعد مطابقة الشروط المطلوبه علي قناتك وابرز الشروط هي حصولك علي 10 آلاف مشاهدة والامتثال لجميع قوانين يوتيوب المنظمة للموقع وحتي بعد قبولك اصبحت الان معرض لتعطيل الدخل في اي وقت اذا خالفت اي شرط من شروط او قنوانين يوتيوب ويسمح لك بطلب مراجعة اخري بعد انتظار شهر اخر لطلب مراجعة جديدة وتفعيل تحقيق الدخل .. طبعاً في الشبكات بمجرد مع تربط مع الشبكة وقناتك صفر مشاهدات ومشتركين القناة بتفعل دخل.
تاني عيب هي الكارثه الازلية وتعطيل الدخل النهائي علي قناتك لو حصل مشكلة في حساب جوجل ادسنس. خلونا نوضح النقطة الغبية دي.

كتير من اصحاب القنوات وقعوا في الفخ الظالم ده

هندي مثال دلوقتي انا معايا ادسنس عادي وشغال عليه في موقع وفي نفس الوقت رابط الادسنس بقناة يوتيوب لو لقدر الله حصل مشكلة علي مستوي المواقع اللي رابطه مع الحساب والحساب اتقفل فبتحصل الكارثه دي ان قناتك بتعطل دخل للابد علي يوتيوب وبتبقي زي البيت الوقف ولا انت عارف تشغل عليها اعلانات ولا تربطها بحساب ادسنس تاني ولا عارف تربطها بشبكة بارتنر خارجية والحل الوحيد انك تسترجع حساب الادسنس اللي كان رابط بالقناة .. وطبعاً ده شئ غبي جداً لان القناة بتتظلم من غير ذنب حتي لو قناتك مطابقة مية في المية لقنوانين يوتيوب فهي بتروح في الرجلين مع خسارة حساب الادسنس .. عشان كده بنقول بلاش تربطوا قنوات ادسنس مع حسابات عادية.
في نفس المنطقة موضوع الادسنس الملوث وده موضوع اغبي من اللي قبلية وهو ببساطة لو حصل لقدر الله وكنت رابط اكتر من قناة بتملكها علي حساب ادسنس واحد وتم غلق قناة واحده لمخالفة بنود وشروط يوتيوب فمبنتهي السذاجة بيتم اخذ العاطل في الباطل وغلق جميع القنوات المربوطة بنفس حساب الادسنس بدون حتي مراجعة هذة القنوات وحتي لو قنوات لم تخالف فيها بند واحد من بنود وشروط يوتيوب وده موضوع حصل مع الاغلبية في الفترة اللي فاتت.
* الغلق العشوائي * الاستهانة واستباحة حقوق الناشرين الغلابة اللي شغالين مع ادسنس بقي خبر ثابت في نشرة الاخبار كل يوم الاف القنوات تتقفل بسبب وبدون سبب بمجرد ان القناة تعمل سبايك وارباحها ومشاهداتها ترفع شوية بقي عادي جداً تكون تعبان في قناة بالسنين واذ فجأءتاً تلاقي نفسك بضغطه زر برة يوتيوب بالكامل والامثلة كتير واكيد الاف من اللي ع الجروب جربوا موضوع الغلق العشوائي لقنواتهم واخذ العاطل في الباطل عند حدوث اي مشكل في يوتيوب ومن اواخر 2015 واحنا كلنا بنعاني من المشكلة دي لان حملات الغلق العشوائي في اوقات كتير او معظم الاوقات مش بتفرق بين محتوي حصري متعوب عليه وبين القنوات الناسخة والمخالفة والمقزز في الموضوع بالنسبة للقنوات المخالفة او اللي شغاله ان الموضوع بيحصل بطريقة البلطجة يا عم يوتيوب ماشي انا قناتي مخالفة طب ليه مش تطبق القنوانين والتنظيم اللي انت حاطه ليه متحذرنيش بمخالفة عشان انتبه لمخالفاتي يعني اكون تعبان في قناة سنة واتنين واجي اخالف في حاجة القناة تطير طبعاً الموضوع مفيهوش حتي شبهة عدل امال ليه عملتوا المخالفات سواء ارشادات منتدي وقوانين يوتيوب او مخالفات حقوق الطبع والنشر وبقي العادي دلوقتي ان اي قناة تطير من غير حتي تنبيه او مخالفة تعرفك انك مخالف وده شئ من رابع المستحيلات يحصل مع قناة رابطة ببارتنر مستحيل لو انت رابط ببارتنر ومحطوط علي السيسيتم الرئيسي المانجيد بتاعها وقناتك تتقفل عشوائي قناتك مش هتتقفل الا بـ 3 مخالفات حقوق طبع ونشر او 3 مخالفات ارشادات منتدي غير كده قناتك في الامان.

*التفضيل السري والغير معلن في عرض الاعلانات علي القنوات المرتبطه بـ mcn او cms*

للأسف بعد مراقبة شخصية لـ مئات القنوات علي يوتيوب ومراقبة سلوك عرض الاعلانات والمقارنة بين قنواتي الشخصية تبين لي ان هناك تفضيل كبير للقنوات المربوطة مع شبكات في عرض الاعلانات مما يحدث فروقات في اداء الارباح بين الناشرين وتابعت واختبرت الموضوع بنفسي وقارنت بين قنوات شخصية ليه رابطه بادسنس وقنوات مع بارتنر وايضا لم يكفيني ذالك وقمت علي مدار شهور بمتابعة الموضوع وتطبيق المقارنه علي مئات القنوات الاخري وتقدر بسهولة تثبت ده لما تجرب بنفسك تصفح قنوات مربوطه مع ادسنس واخري مع باتنر والمقارنة في سلوكيات وكمية ظهور الاعلانات ونوعيتها.
*سرقة ارباح القنوات المغلقة*
انا من الناس اللي تعرضوا لعمليات غلق كبيرة جداً في اخر 3 سنين لقنواتي حتي اني كنت بدون كل عملية غلق لقناة من قنواتي وبكتب جنبها الفلوس اللي خسرتها وكانت في القناة وبعد ما جمعت المبلغ كله اكتشفت ان جوجل واكله عليا ارباح في القنوات المغلقة تخطي الـ 45 الف دولار.
طبعاً الناس كلها عارفه ان مثلا لو شغال طول الشهر في القناة لحد اخر نص ساعة في الشهر يوم 30 والقناة اتقفلت فانت مش هيتحولك ولا مليم من ارباح الشهر ده لاي سبب من اسباب الغلق غلط عشوائي او بمخالفات سواء حقوق او ارشادات منتدي وطبعاً دي تعتبر سرقة لمجهود الناشرين لان القناة لم تسبب اي ضرر للمعلينين والنقرات اللي علي القنوات مش بتكون غير شرعية لان سبب القفل سبب اخر ومحدش يقنعني ان يوتيوب او جوجل بيرد الفلوس دي للمعلنين لان اصلا المعلنين لم يتضررو من كده واعلاناتهم ظهرت للناس وكلو تمام وللأسف الفلوس بتروح لكرش شركة جوجل وبتتشفط وملايين الدولارات شهرياً من ارباح الناشرين بيتم السطو عليها بنفس الطريقة عكس شركات البارتنر متي تغلق القناة في اي وقت الارباح بتتحول لاخر لحظة غلقت فيها القناة وده يبين فرق التعامل.
*الدعم السئ* يعاني معظم الناشرين ومنشئ المحتوي بالدعم السئ من يوتيوب عندما تكون شراكتك مباشرة مع جوجل ادسنس عكس الدعم المقدم لك من الشبكات وطبعاً مستوي وخدمة الدعم بتختلف من شبكة لاخري لان في شبكات مهملة جداً لنقطة الدعم للمشكلات الخاصه بالقنوات ولكن عندما تراسل شبكة يوتيوب بخصوص مشكلة ما في قناة يتم التعامل الفوري والعادل مع المشكلة عكس المنشئ العادي الذي من الممكن ترك مشكلة بدون حل ولا رد لأسابيع طويلة.
دي طبعاً بعض الامثلة علي عيوب الربط المباشر مع ادسنس ومتأكد ان في عيوب اخري كتير مش وارده علي بالي دلوقتي وممكن تشاركوني بيها في التعليقات تحت البوست.

(مميزات وعيوب الربط مع شبكة بارتنر خارجية)

اول واقوي ميزة هي معاملة قناتك معاملة حسنة تحس كده انك علي الفريست كلاس او درجة رجال الاعمال مثلا مستحيل قناتك تعطل دخل لاي سبب من الاسباب وانت مع بارتنر حتي لو انت قناتك قايمه علي المخالف وايضا مستحيل قناتك تتقفل عشوائي وانت مع شبكة ( هيطلعلي واحد يقولي كنت مع فريدوم وbbtv وقناتي اتقفلت عشوائي ومعلملوليش حاجة )
سيدي الفاضل في فرق كبير انك تدخل شبكة ماشيه علي سيستم افليتيد وفرق ان تدخل علي سيستم مانجيد رئيسي وهديلكم مثال حي يوضحلكم الموضوع وفي ناس جربوه وحكو تجربتهم في الجروب منهم الراجل ده محمود مزيكا.
لو تفتكرو في بداية 2017 ظهرت لينا شبكة وطن نيتورك في ثوب جديد واطلقو مبادرة سموها مبادرة القنوات الناشئة وكانو بيلمو اي قنوات صغيرة حتي تحت الالف مشترك وطبعاً ده كان فخ كل القنوات دي كانت بتدخل علي cms فرعي افليتيت للشبكة بأسم Watan Network Factory ومش بيدخلو علي السيسيتم الرئيسي للشبكة اللي بأسم Watan Network .. وبالتالي انت علي سيستم افليتيت مش مناجيد ومفيش فرق بينك وبين اللي رابط مع ادسنس وبالتالي بتحصل مشاكل الغلق العشوائي ودي الطريقة اللي بيتعامل بيها شبكاات كتير زي فري دوم وكويز جروب و bbtv وعمر الشبكات دي ما هيحطوك علي السيستم الرئيسي الا لو انت قناة كبيرة وبتدخلهم ارقام كبيرة.. المغزي انك لو علي سيسيتم محترم من تاسع المستحيلات تتعرض لغشومية يوتيوب من اي نوع سواء قفل عشوائي او تعطيل دخل او تعرضك لسطو بدون حق من شبكات ظالمه بتعمل مطابقات علي محتويات مش ملكها.
*الحماية* انا واحد بعتبر ان الشبكة شركة تأمين وليكن مصر للتأمين وحاسبها حسبه بسيطة انا لو واحد عندي محل او شركة او عربية طبعاً عشان أأمن نفسي من اي حوادث بتضر اني أأمن علي الممتلكات دي وبالتالي ببقي مطالب بدفع مبلغ مقابل التأمين ده هي نفس الفكرة بالظبط الشبكة بتقدملك حماية من نوعين اول نوع الحماية من الوحش الكاسر الحج صاحب البيت يوتيوب وزي ما وضحنا انت لما بتبقي مع شبكة بتبقي ميقن ان قناتك مش هتتقفل الا بتلات مخالفات فقط .. وحماية اخري من باقي البشر ذوات النفوس الضعيفه من سارقين للمحتوي ومبلغين عليه.

*الحماية من تبليغات حقوق الطبع والنشر*

لو ليك منافس وحاول يرزعك بلاغ كيدي علي اي فيديو ليك الشبكة اللي بتتصرف وبترد مكانك وبتعرف تجيبلك حقك.
لو انت بتعتمد علي سياسة الاستخدام العادل في محتواك وجالك مخالفة من اي شركة انت واخد منها محتوي ومستخدمه البارتنر هو اللي بيتعامل معاها.
لو حصل معاك زي ما حصل معايا وكنت بتستخدم ميوزك في فيديوهات كتير كان مسموح باستخدامها مجاناً وبعدين اصحاب الميوزك طمعوا فيها وفشخو اللي واخدينها مطابقات البارتنر هو اللي هينقذك.
لو بتتعرض لمخالفات حقوق طبع ونشر ظالمه باستخدام الميتا داتا والبيانات الوصفية زي مثلا لما يكون في مسلسل في رمضان اسمه كفر دلهاب وانت عامل فيديو طالع فيه بنفسك او عامل فيديو من صنعك ويجيلك مخالفه لمجرد انك ذكرت اسم المسلسل يبقي الشبكة هي اللي هتحميك.
*ميزات حصرية*
اكبر ميزة ممكن تقدمهالك الشبكة هي اضافة الـ content id طبعاً مش كل الشبكات بتقدمها بشكل اساسي لكل القنوات لكن تقدر تطلبها من اي شبكة انت مشترك معاها لو محتواك متسوح وناس كتير سارقاه وباستخدام الاداة دي انت ممكن ترسل مطابقات لاي حد مستخدم المحتوي بتاعك وتقدر تستغل سرقة المحتوي بتاعك فأنك تحصل علي الارباح اللي بيجنيها السارق بمحتواك او تحظر المحتوي من العرض.
وايضا في ميزات اخري زي خاصية الـ shows - العروض ودي كنا شرحنا تفصيلها في بوست منفصل قبل كده تقدر تطلع عليه من هنا: https://www.facebook.com/groups/ARABSEO/permalink/908766699303343/
وفي ميزة اخري بتنزل بشكل اساسي وهي ميزة الاعلانات الغير قابله للتخطي بنوعينها الطويل والقصير ودي ميزة تقدر تحصل عليها من خلال الدعم لو انت مع ادسنس بس هي بتنزل بشكل اساسي لو انت رابط مع شبكة.
وطبعاً باقي المميزات هي العيوب المذكورة في الربط مع ادسنس والعيوب اللي اتذكرت دي كلها مستحيل تحصل معاك وانت مع بارتنر.
*الغير ملائم للمعلنين*
الغير ملائم للمعلنين موجود في القنوات اللي مع ادسنس والقنوات اللي مع بارتنر بس بردو حتي في النقطة دي في تفرقه بين الاتنين يكفي اقولك انه لما بتطلب مراجعة الفيديو بيتراجع في نفس الساعة اللي بعت فيها الطلب عكس قايمة الانتظار اللي بتاخدها في ادسنس ويفضل الفيديو في المراجعة يومين تلاته ويطير عليك ارباحه ومشاهداته.
ده غير ان بصراحة مش عارف دي صدفة ولا تفرقه ان الموضوع قل معايا في قناة بنسبة 70% بعد ما ربط ببارتنر ومبقاش يظهرلي عمال علي بطال.
(العيوب)
النسبة المقتطعة ارباحك من الشبكة مقابل الانضمام والدعم والخدمات ودي طبعاً نسبة مش ثابته وبتخلفت من شبكة لشبكة ومن قناة لقناة ولكن هي بتتراوح من 10 لـ 40% حسب الشبكة وحسب وضع ومحتوي قناتك.
وده العيب الوحيد اللي في لشبكات ولو انه مش عيب منفر لان حقهم مقابل الخدمات والحماية اللي بتاخدها.
---
*الخلاصة*
اول حاجة لازم كلنا نبقي عارفين ان مفيش حاجة اسمها يوتيوب عامل حملة الشهر ده او السنة دي او السنة اللي قبلها عشان يوتيوب من 2015 وهو ماشي علي نهج معين وسياسة جديدة شوفنا كلنا نتايجها وهي تقليل عدد الناشرين عشان يوتيوب يفضل ويحافظ علي نفسه كا افضل منصة لجني الارباح وطبعاً يوتيوب بيضحي في المقام الاول بصغار الناشرين واللي من غير حماية او شبكات في ضهرهم لصالح كبار الناشرين عشان يفضلو مستمرين ويجنوا ارباح اكتر ويفضلوا معمرين المنصة وميهربوش لاي حته تانية.
فخلاصة الكلام انت لو عاوز تحافظ علي مكانك في يوتيوب وتريح بالك وتعرف تنام بليل لازم تعين حارس لقناتك ياخد باله منها ويحميها من بطش يوتيوب وقوانينو اللي بتطلع بليل دي.
عايز تعرف قد ايه الباتنر مهم بص علي اي قناة مليونية او اي قناة كبيرة هتلاقي ان بنسبة 95% القنوات دي مع شبكات بتروضلهم يوتيوب وبتتفاهم معاه.
عايز تعرف قد ايه الباتنر مهم شوف امثله لقنوات منتهكه كل شروط يوتيوب ومع ذالك مستمرين ومن سنين ومحدش بيجي جنبهم حتي بعد الخراب اللي بيحصل ع الكل.
باختصار انت شغال مخالف انت شغال حصري لازمك شبكة في ضهرك
وانا لحد فترة قريبه عمري ما كنت بتعامل مع شبكات ولما اتعاملت فهمت وقدرت التفرقة العنصرية بين قنوات ادسنس وقنوات البارتنر والحمد لله واخيرا بقيت اعرف انام بليل وبصحي وانا مش قلقان ان قناتي تتقفل ومجهودي يطير.
---
كالعادة هيطلع ناس تعترض وتخالف وجهة نظري وده حق اي حد بس انا بتمني ان اللي يعترض يقول كلام في محلة ويطلع يحكي امثلة وتجارب مش فتي وهو عمره ما جرب ولا قارن.
بالتوفيق للجميع وانتظروا مفجأة كبري من العيار الثقيل وفرصة عظيمة جداً لكل اليوتيوبر اللي في الجروب.
وكالعادة اي استفسار انا في الكومنتات.

مراد وعدي
كاتب ومحرر اخبار اعمل في موقع الربح من ادسنس .

جديد قسم : بديل ادسنس

إرسال تعليق